Storie vir ’n voorskoolse kind

• Die teikenleser is ’n voorskoolse kind van drie tot vyf jaar.
• Die storie moet tussen 450 en 500 woorde lank wees.
• Skryf die finale woordtelling aan die einde van die storie.
• Gebruik Calibri, 12 punt, met 1,5-reëlspasiëring.
• Druk die storie op A4-papier of A4-karton.
• Die tema is die skrywer se eie keuse.

Kies een hoofkarakter met ’n eenvoudige wens, behoefte of probleem. Die karakter moet geloofwaardig wees en mag sterk punte, onsekerhede en drome hê. Laat die hoofkarakter self iets probeer, ’n probleem oorkom of ’n ontdekking maak.

Gebruik ’n duidelike begin, middel en einde:

• Die begin stel die karakter, plek en klein uitdaging vinnig bekend.
• Die middel neem die kind op ’n interessante reis met aksie, herhaling of ’n verrassing.
• Die einde bring veiligheid, vreugde of bevrediging en moet gelukkig afsluit.

Kort, sterk sinne werk goed vir voorskoolse luisteraars. Gebruik bekende woorde en konkrete beelde. Direkte rede gee lewe aan die karakters. Herhaalde frases, rymwoorde en klanknabootsing kan die kind aanmoedig om saam te luister of te praat. Humor is welkom, mits dit eenvoudig en ouderdomsgeskik bly.

Skryf vanuit ’n voorskoolse kind se wêreld. ’n Klein probleem soos ’n verlore speelding, ’n vrees vir die donker, ’n nuwe maatjie of die aanleer van ’n vaardigheid kan groter betekenis hê as ’n ingewikkelde avontuur. Fantasie moet versigtig gebruik word omdat jong kinders nog tussen verbeelding en werklikheid leer onderskei. Superheldverhale is nie ’n goeie keuse vir hierdie ouderdomsgroep nie, veral waar gevaarlike gedrag nageboots kan word.

1. Lees die storie hardop en luister vir lang of swaar sinne.
2. Kontroleer woordorde, sinsbou, tydsvorm, spelling en leestekens.
3. Verwyder verduidelikings wat die aksie vertraag.
4. Maak seker dat die dialoog natuurlik klink.
5. Tel die woorde en hou die finale weergawe binne 450 tot 500 woorde.
6. Laat ’n tweede persoon die skoon kopie proeflees.

Taal en tegniek sluit woordorde, sinskonstruksie, leestekens, konsekwente tydsvorm en beskrywende woorde in. Inhoud en kreatiwiteit sluit die omgewing, beeldspraak, klanknabootsing, konflik, aksie, toon, dialoog, verrassing, karakterontwikkeling en die impak van die slot in.

Plak ’n klein koevert aan die agterkant van die skryfstuk. Merk dit met SKRYFKUNS, die deelnemer se naam, tak, streek en provinsie. Plaas die skryfstuk in ’n deursigtige liaseersakkie. Heg die beoordelaarskaartjie met ’n lang genoeg stuk hekelgaring aan.

• Oorspronklike storie vir ouderdom drie tot vyf
• 450–500 woorde en woordtelling aangedui
• Calibri 12, 1,5-spasiëring, A4
• Duidelike begin, middel en gelukkige einde
• Ouderdomsgeskikte taal, humor en konflik
• Taalversorging volledig nagegaan
• Korrek verpak en gemerk